نصائح تهمك يا ست البيت ادخلى وهتدعيلى

[ندعوك للتسجيل في المنتدى أو التعريف بنفسك لمعاينة هذا الرابط]

جبتلكم احلى نصايح مهمة لكل ست بيت وصدقونى هتدعولى
نبتدى

اول حاجه لما تيجى تسلقى مكرونه او بيض او اى حاجه تانيه بتلاقى الحله تغمق من جوه مكان الميه وتقعدى تدعكى فيها لما تزهقى الحل هو انك تحطى شوية خل فى الميه وهى بتغلى ومتخافيش ولا هيبان طعمه ولا ريحته يعنى حطى شويه صغيره هتلاقيها ولا الجديده بدون مجهود.
براد الشاى الالمنيوم بعد ما نغلى فيه الشاى اكتر من مره بتلاقى لونه اتغير من جوه وبرضه ايدك بتتهرى من دعكه فى طريقه سهله وبسيطه علشان تنضفيه بدون تعب وهى انك تحطى فيه مايه وملعقه صغيره خل وملعقه صغيره كلور ونقطة صابون سايل وتسيبيه يغلى عالنار 5 دقايق بس وبعد كده اتفرجى على نضافته من جوه .
لما تكونى بتطبخى حاولى يكون المطبخ نضيف قبل ما تشتغلى, وحافظى كمان على ترتيبه اثناء ما انتى واقفه فيه, رجعى اى علبه تستعمليها مكانها على طول, اى مواعين اغسليها اول باول, خلى دايما جنب البوتاجاز طبق فاضى علشان تحطى فيه المعالق اللى بتستخدميها فى تقليب الاكل, نضافة المطبخ هتخليكى تتحركى بسهوله وكمان يكون عندك نفس تبدعى فى الاكل .
حمامك كل يوم قبل ما تنامى تحطى فى الارض شوية كلور وحبة مسحوق وتدعكيه بالمكنسه اسهل ما توطى فى الارض بالفرشه والتواليت نفس الطريقه وتدعكيه بفرشة التواليت او لو هتستحمى يا ريت تعملى ده قبل ما تستحمى ماانتى كده كده فى الحمام, وبعدين تشطفيه كويس علشان المسحوق اوالصابون ميزحلقش حد ولو عندك اولاد لازم تعوديهم يكبو مايه على قاعدة التواليت وينشفوها بالفوطه المخصصه للتواليت علشان يكون حمامك بدون بكتيريا وريحته دايما نضيفه.
لو الصبانه عندك عليها بواقى صابون كتير حطى حبة كلور على سلك مواعين وادعكيها كويس هتلاقيها نضفت بسرعه من غير مجهود بس استخدمى حتة سلك صغيره وارميها اول ما تخلصى علشان الكلور بيخليه يصدى.
اوعى ترمى الهدوم اللى دابت او القماش بتاعها شاط من غير ما تستخدميها انا بقطعها حتت صغيره وبمسح بيها البوتاجاز من بواقى الاكل او لما اللبن يفور عالبوتاجاز وبكده حيسهل عليكى تنضيف البوتاجاز,ومكن تمسحى بيها السيراميك حوالين البوتاجازلما يطرطش عليه الاكل وانتى بتطبخى وبعد كده تقدرى ترميها ف الزباله.
لو عندك طفل ما بينمش كويس او بيقلق كتير بالليل او بينام متاخرالحل بسيط وسهل اوى اولا دش مايه دافيه وركزى المايه على مؤخرة العنق حركه بتهدى الاعصاب وبعدين كوباية لبن دافى سكر قليل وبعدها هدى نور الاوضه او ممكن تواربى الباب وتاخديه فى حضنك وتطبطبى عليه او تحسسى على شعره بالراحه هتدعيلى بعدها لما طفلك ينام نوم متواصل ولفتره كبيره بدون ما يقلق بلليل ويقلقك معاه وكمان هايصحى اعصابه هاديه وكله نشاط ونفسيته كويسه,بس اهم حاجه يكون شبعان ,وكمان ده هيحميه من الامراض لان النوم المتواصل+لبن قبل النوم +والحمام الدفى اللى بيهدى اعصابه وبيشيل كتير من البكتيريا والجرثيم اللى علقت فى جسم ابنك طول النهار=صحه جيده ومناعه قويه وهدوءنفسى للطفل,وحتى لو كان طفلك لاقدر الله مريض دا هيساعد فى شفاه انشاء الله.
وممكن كمان تعملى كده مع جوزك لو هو عايز يسهر وبيزعجك بطلباته طول الليل ههههههههههههههههههه.
اوعى تنامى والحوض مليان مواعين او سايبه اكل بره التلاجه او الرخامه مش نضيفه او الزباله مكشوفه لانك بكده بتعملى وليمه لاباس بها للنمل والصراصير,ومتنسيش الارضيه بتاعة المطبخ طبعا لازم تمسحيها باى مطهر ولو معندكيش حبة مسحوق صغيرين وبكده هتلاقى ريحة مطبخك حلوه وكمان مفيش اى حشره هاتفكر تدخل بيتك وتحتله.
بواقى الاكل بتاعة اليوم ممكن تحطيها فى علب بلاستيك والعلب دى مش غاليه بتتباع فى السوق 2علبه ب2.5جنيه منها هتخلى شكل التلاجه حلو وكمان هتخففى الزحمه جوه التلاجه وبرضه هتحافظى على صحة اسرتك لان الماده المصنوع منها الحلل مهما كانت بتتفاعل مع الاكل لما بيكون فيها لفتره طويله وودعى بقى الدربكه اللى بتحصل لما تيجى تستعملى التلاجه وسقوط الطعام ودلقه على الارض.
لازم لازم تتخلصى من الكراكيب اول باول علشان يكون شكل بيتك حلو و مرتب والنضافه تبان عليه ومجهودك مايروحش هدر وكمان هتتخلصى من عصبيتك انتى وجوزك واولادك.
لما تيجى تنضفى الارضيه بتاعة البيت [ندعوك للتسجيل في المنتدى أو التعريف بنفسك لمعاينة هذا الرابط]بدل جرادل المايه والمجهود الكبير علشان تلمى المايه من الارض,اولا:اكنسى الارض بمكنسة البلاط الناعمه,وبعد كده جيبى جردل مايه وحطى فيه ربع كوباية كلور ومعلقتين صغيرين مسحوق او صابون سائل او ديتول او شاور جيل اللى متوفر عندك وامسحى الارضيه بعد ما تبلى الفوطه كويس من الخليط ده وتعصريها بس مش جامد اوى وامسحى بيها وسيبى بقى الارض تنشف وافرشى السجادبعد ما تخلصى لاحظى الفرق فى ريحة بيتك اللى الجيران كمان هيلاحظوها.دا طبعا غير انك بكده هتكونى طهرتى البلاط.
السجاد كتر غسيله بيخليه يدوب بسرعه ولونه يتغيردا غير مجهودك الفظيع فى دعكه وشطفه والوقت الكبير اللى بياخده علشان ينشف انتى ممكن تجيبى نفس الخليط اللى انتى عملتى بيه الارضيه بس تقللى الكلور والمايه وتسندى السجاد على سور البلكونه او تفرديه على الارض وبفرشة السجاد تبليها وتنطريها من المايه وتمسحى بيها السجاد وتقلى على الاماكن المتوسخه هتلاقى البقع تختفى كانه سحر وتسبيها تتهوى شويه فى الشمس لغاية ما تخلصى مسح الارض وبعدين تفرشيها وبكده حتوفرى كتيرمن مجهودك فى غسيله وكمان عمر السجاد هيطول وبرضه هتلاقيها زى الجديده لان الوبر هيكون اتشال من عليها وهتلاقيه متعلق فى الفرشه. ومش هتغسليه غير مره فى السنه وممكن ما تحتاجيش تغسليه خالص.
فى دلوقتى زجاجات عصير بتتباع تشبه البيبرونه دى ممكن تعودى طفلك انه يشرب فيها اللبن وبكده مش هيتقلب عليه وهو بيشرب ويا سلام بقى لو عندك طفل فى سن الفطام دى هتساعدك كتير اوى وهتسهلك عملية الفطام وكمان طفلك هيتعود انه يشرب اللبن وعمرك ما هتسمعى منه كلمة ما بحبش اللبن بس اهم حاجه تقللى السكر فى اللبن ولازم تديهله دافى سواء فى الصيف او الشتاء واوعى تنسى تغيريها بانتظام.
عودى نفسك دايما قبل ما تنامى تستعملى غسول خارجى انا باستعمل مالفا ولو عندك بنت فى سن البلوغ عوديها كمان تستعمله دا تشطيف بس وبعدها تنشفى كويس علشان تبقى ريحتك حلوه كمان بيديكى احساس بالراحه وفى نفس الوقت تحمى نفسك من الامرض الوقايه خير من العلاج وكمان هتتخلصى من الريح الوحشه اللى بنلاقيها فى هدومنا الداخيه وتخليكى تغيرى كل شويه دا غير الاحساس بعدم الثقه بالنفس.
لما تكونى فى مشوار وترجعى لازم تغسلى وشك علشان تتخلصى من الميكروبات اللى علقت فى جلدك وانتى فى الشارع بسبب الاتربه وعوادم السيارات ويكون افضل لو خدتى دش لو امكن وعودى اولادك كمان على كده علشان تحموا نفسكم من الامراض الجلديه والحبوب.
قبل ما تبداى يومك خدى معلقه كبيره عسل نحل وسمى الله
وادعى ربنا يقويكى .

اتمنى اكون افدتكم كلكم

جزاكى الله خيرااا

وجزاكى الله مثله
شكرا يا مرمر نورتى ياقمر

بنورك

يا قمر

عدد المساهمات : 4 تاريخ التسجيل : 19/10/2011

: :تسلم افكارك
نصائح تهمك يا ست البيت ادخلى وهتدعيلى 1834624620

وتسلم الايادى اللى كتبت

شكرا ياقمر
نورتى الموصوع ياجميل

» احلى تسريحات لكى فى البيت روعة