قالى يافلاحه ماتلزمينيش
.
:
:
:
أنا عاوز ادلع روحى وأعيش
عاوزها بنوته شقيه
والفرق بينك انتى وهيا
هيا البديهات والبنطلونات
وانتى اكيد لابسه الجلابيه
وكمان زمانها بكرانيش
قلتله طيب سيبنى وعيش
ماانت كمان بعد كلامك دا ماتلزمنيش
سابنى وراح وتعالوا نشوف
خلّته عايش عمره فى خوف
وبقت هيا الآمر الناهى
ماهو اصل صنفه اكيد معروف
كل كلامه بقى طيب حاضر
وان قال لأ تعمله محاضر
يعنى عليه سمع و100 طاعه
نرجع بقى ونقول ياجماعه
وانا يوم ماشيه على الزراعيه
لابسه الفستان زى قيثاره
والكعب العالى ونضاره
سمعت واحد بيقول ايه..
الحلو ده فى بلدنا خساره
اتاريه هو وحاله ما يسُر
بعد ماخد ست الستات
داق الحلو فى كاس شربات
وبعد كده عايش فى المر
بص وشافنى وقال هو انتى
وربى اشتقنالك ياحبيبتى
دا انتى بقيتى همزة وصل
بين الشياكه وبين الأصل
وانا من غيرك صعب أعيش
قلتله لأ صدقنى ياباشا
صنفك عمره مايعجبنيش
أصل انا رغم شياكتى وشكلى
وطريقتى فى لبسى أو أكلى
لسه بقى وبكل صراحه
البنت اللى تلف الدنيا
ماتنساش يوم انها فلاحه